Studente brand Limpopo-kollege se biblioteek af

Meer as R1 miljoen se skade is deur oproerige studente by die Sekhukhune-kollege vir verdere onderrig en opleiding (FETC) naby Groblersdal in Limpopo aangerig.

Kol. Ronél Otto, polisiewoordvoerder in Limpopo, sê twee motors is Dinsdagaand op die Barlow-kampus in Motetema aan die brand gesteek.

Vensters van geboue is met klippe uitgegooi en volgens Jacques Smalle, DA-leier in Limpopo, is ’n biblioteek afgebrand.

News24 berig studente het oproerig geraak omdat hulle glo ontevrede was met ’n gesloer in die stemproses gedurende die studenteraadsverkiesing. Studente het Dinsdag gestem, maar het oproerig geraak toe die verkiesingskomitee volgens hulle nie gou genoeg die uitslae bekend gemaak het nie.

Die geweld het Dinsdagaand ná 20:00 uitgebreek.
Die drie groepe wat aan die verkiesing deelgeneem het, is die Suid-Afrikaanse-studentekongres (Sasco), die EFF en Sekhukhune Express.

Smalle het die vandalisme veroordeel. “Die geld wat nou gebruik moet word om die skade te herstel, kon gebruik word om vir 20 behoeftige studente se studies te betaal.”

Hy sê 1 200 studente word benadeel deur die biblioteek wat afgebrand is.

Otto sê die polisie ondersoek klagte van opsetlike saakbeskadiging en brandstigting. Niemand is in hegtenis geneem nie.

Die oproer het die bekendmaking van die verkiesingsuitslag vertraag. Dit is onduidelik wanneer dit bekend gemaak sal word.

Bron – Netwerk24


 

Enjoyed this post? Share it!