Swaar reën, sneeu op plekke; Gauteng gaan ook bibber

Swaar neerslae het ook die afgelope paar dae oor dele van die Wes-Kaap voorgekom, maar dié reënweer behoort van Vrydagaand af op te klaar.

Volgens Christina Thaele, weervoorspeller by die SAWD, gaan die temperatuur Sondag in Gauteng “skerp daal” – met tussen 4ºC en 6ºC.

 “In Johannesburg word ’n maksimum temperatuur van 14ºC verwag en in Pretoria ’n temperatuur van 16ºC.

“Dit gaan ook bewolk wees, daarom gaan dit voel asof dit nog kouer is,” sê Thaele.

Volgens haar het die kouefront wat die Wes-Kaap Donderdag getref het, tot swaar reën gelei wat oorstromings in die Wynlande en die Overberg-streek kan veroorsaak.

Die kouefront gaan teen Vrydagaand na die Oos-Kaap beweeg, waar stormsterk winde langs die kus verwag word. Dit gaan egter steeds die naweek koel tot koud in die Wes-Kaap wees.

Daar is ook ’n moontlikheid van sneeuneerslae oor die bergagtige dele in die suide en suidooste van die land, insluitend die Oos-Kaap en die Underberg-omgewing in KwaZulu-Natal

“Mense moet weens moontlike ontwrigtende sneeustorms baie versigtig wees wanneer hulle oor bergpasse ry.”

In skrille kontras met die reën en sneeu, is ’n brandgevaarwaarskuwing vir die Chris Hani-distrik in die Oos-Kaap uitgereik, sê Thaele.

Bron: Netwerk24


 

Enjoyed this post? Share it!