Swart boere wag verniet vir premier

Honderde swart boere van die Vrystaat het tevergeefs gewag vir die premier Ace Magashule om op te daag vir ‘n beplande vergadering met hulle in Welkom.

Die boere, waarvan die meeste lede van Nafcoc en Afasa is, het op uitnodiging van die premier self van regoor die provinsie heen in Welkom saamgetrek om landbousake te bespreek.

Die vergadering sou teen 10:00 begin, maar Magashule was so besig met ANC-partysake en stemwerwing elders in Welkom dat hy teen 15:00 steeds nie opgedaag het nie. Talle boere het maar gery. Magashule het wel oor die etensuur sy hoogs omtrede LUR vir gesondheid, Benny Malakoane, gestuur om die boere toe te spreek.

Baie boere meen die dag was ‘n mors van tyd en geld. Een boer het gevra hoe dit moontlik is dat ‘n LUR van die mislukte departement gesondheid met die boere wil vergader, maar sy eie departement is in wanorde.

Van die boere voel ook sleg oor die manier waarop die premier hulle behandel het.

Malakoane het die boere vertel dat die provinsiale regering beoog om in elke distrik vyf kommersiële te identifiseer wat met kennis en geldelike hulp bygestaan sal word.

Hy het gesê dat daar na manier gekyk sal word om waardetoevoeging tot produkte te doen deur meer slagplase en meulens in die provinsie op te rig sodat produkte in die provinsie verwerk kan word.

Waarskynlik sal Magashule die planne aanpak deur sy voorkeur optrede, en dit is om Kubane in die Vrystaat in te bring.

Bron: Vryburger


Enjoyed this post? Share it!