Sy’s ‘vermoor deur ’n man wat sy help’

winnie-rustDie 77-jarige skrywer Winnie Rust is waarskynlik vermoor deur ’n jong man wat sy die afgelope tyd finansieel bygestaan het.

Volgens betroubare bronne het dié verdagte die Rust-familie se aandag getrek nadat hy op skool goed in sport presteer het. Hulle het hom toe finansieel gehelp. Hy het glo die afgelope Woensdagmiddag na Rust se wit dubbelverdiepinghuis in die stil Uitsig-buurt in Wellington gegaan. Dit is nog onbekend hoe die persoon toegang tot die huis verkry het. Niemand het hom ook die huis sien binnegaan nie.

Rust se 83-jarige man, Manie, ’n afgetrede mediese dokter, was glo in ’n slaapkamer op die tweede verdieping vir ’n middagslapie. Hy het omstreeks 15:30 wakker geword van die klokkie wat by die hek gelui het. Hy het opgestaan en daar met twee onbekende mans gesels. Ná die mans se vertrek het hy glo na die “klein kombuis” (daar is twee kombuise) gegaan en op sy vrou se liggaam afgekom.

EEN VAN DIE RAAISELS IS WAAROM HAAR DUITSE HERDERSHOND, MAX, NIE HAAR AANVALLER(S) AFGESKRIK HET NIE.

Sy was geklee in ’n wit bloes en ligbruin langbroek.

 Die Rusts se 58-jarige huiswerker, Rachel (Non) Jones, was nie by die huis nie. Woensdae en Vrydae is haar afdae.

Die moordenaar het Rust waarskynlik in die kombuis oorval, haar hande en voete vasgebind en haar mond met kleefband toegeplak.

Een van die talle raaisels rondom haar dood is waarom haar Duitse herdershond, Max, wat bure as “baie beneuk” beskryf, nie haar aanvaller(s) afgeskrik het nie.

Rust se lyk is gevind op ’n hondematras wat in die kombuis gelê het. Behalwe Max het hulle ook ’n tweede, kleiner hondjie, Minnie.

Haar gesig was vol bloed en haar mond met deurskynende kleeflint bedek. Stukkies tou het oor haar bors gelê.

’n Handsak, waarvan die inhoud uitgegooi was, het op ’n stoel gelê. ’n Samsung-selfoon word uit die handsak vermis.

Dr. Rust het toe die polisie ontbied.

Volgens mediaberigte het van die Rusts se bure kort tevore “geluide” uit die huis gehoor.

Jones het Vrydagmiddag vanuit haar beskeie huisie in die Egoli-buurt in Wellington aan Rapport vertel dat sy die afgelope 20 jaar vir “miss Winnie” gewerk het.

Sy het Rust Dinsdagmiddag die laaste keer gesien en is daar weg met twee geskenke van Rust: ’n sakkie appels en ’n blou sambreel, want “soos miss Winnie gesê het: ‘Non, die winter is op pad. Ek wil nie hê jy moet koud en nat word nie.’

“Sy het my nou die dag nog gesê: ‘Non, dankie vir jou getrouheid, eerlikheid en gebede. Jy het min woorde, maar dis met sout besprinkel.’

“Ons twee was Godsmense en het mekaar bemoedig,” sê Jones. Sy vertel hoe Rust haar finan­sieel bygestaan het, ’n stort in haar huisie laat bou het, en haar dogter Zelda se matriekafskeid- en troufoto’s self kom neem het.

“Miss Winnie se laaste woorde aan my laas Dinsdag was: ‘Oukei Non, lekker Woensdag!’”

As die trane begin opwel, vee sy dit vinnig weg voordat sy verskoning maak: “Sorrie, skies, ek’t nie woorde nie.”

Dr. Rust, ’n man wat Wellingtonners beskryf as ’n geliefde dorpsgeneesheer wat die gemeenskap oor baie dekades gedien het, gaan intussen by ’n familievriend op die dorp tuis. Winnie se broer, die oudletterkundedosent dr. Chris van der Merwe, het gister aan Rapport gesê sy swaer kry “baie swaar, veral omdat hy op haar liggaam afgekom het”.

Rust laat ook drie dogters – Winnie Nel, Helene Reid en Anna Rust – en ’n seun, Hugo Rust, agter.

  • Die roudiens vir Rust vind Donderdag 19 Mei om 10:30 in die NG Moedergemeente in Wellington plaas.

Bron: – Netwerk24

Enjoyed this post? Share it!