Te koop: 20 000 plase in Suid Afrika

In Mei vanjaar was dit die eerste keer in die geskiedenis dat meer as 20 000 plase oor Suid-Afrika heen op Property24 te koop aangebied is.

Dit kan weens die droë seisoene wees wat die land die afgelope paar jaar beleef het, sê Johann Bornman, voorsitter van Agri Development Solutions (ADS.

Hy waarsku egter dat ’n mens versigtig met dié inligting van Property24 moet omgaan.

“Maar dit bevestig dat dit die eerste keer in die geskiedenis is wat die beskikbare plase die 20 000-kerf verbygesteek het toe die aanbod van plase einde Mei vanjaar tot 20 071 gestyg het,” het hy by navraag gesê.

Hy skryf dié styging aan ’n paar faktore toe.

“Die belangrikste wat ons moet onthou, is dat die boere se kosteprys tans in ’n knyptang is. Baie kan nie gelykbreek nie.”

Hy sê ook dat die droogte geweldig tot dié styging in die aanbod van plase bydra.

“Die gevolge van die droogte het ons tot dusver nog nie eintlik in syfers gesien nie. Die omvang van die laaste paar jaar se erge droogte gaan ’n jaar of twee neem om te herstel. Ons moet maar net daar deurwerk.”

Hy sê dat die probleem van soveel plase in die mark ’n groot probleem vir die land se landbou kan inhou.
Johann Bornman, Agri Development Solutions vertel: “Daar is ’n duidelike beweging in die sprong vir die ooraanbod van plase. Mense sit hul grond in die mark, maar dan het ander mense nie die aptyt of geld om dit te koop nie.

“As ons kommersiële boere verloor, is hulle moeilik vervangbaar. Dit hou ook groot implikasies vir baie mense, soos die boere en hul werkers, in.”

Braam Hendriks, mede-eienaar van GWK-eiendomme in die Vrystaat, sê dat daar baie meer plase in die Vrystaatse mark is as wat daar kopers is.

“Maar dit is nog geen rede om paniekerig te raak nie,” het hy by navrae gesê.

“Weens die afgelope drie jaar se droogte het die mielieprys baie geval. Ons het wel goeie oeste gehad, maar die prys is laag. Daarom wil mense nie nou koop nie.”


Enjoyed this post? Share it!