TLU SA – verwys beoogde onteieningswet terug

Die landbou-organisasie TLU SA het hom geskaar by diegene wat pres. Jacob Zuma versoek om die omstrede Wetsontwerp op Onteiening na die parlement terug te verwys.

Die organisasie het in ’n petisie aan die president sy besware teen die voorgestelde wet uiteengesit.

Die president van TLU SA, Louis Meintjes, wys in die petisie op die “ongrondwetlikheid” van die wetgewing omdat dit strydig is met artikel 25 van die grondwet wat eiendomsreg beskerm.

In hierdie verband is spesifiek verwys na die definisie van “onteiening” in die wetsontwerp wat die onteieningsgesag toelaat om voogskap van die eiendom te neem sonder om enige vergoeding te betaal.

Hy het ook moontlike slaggate uitgewys in die onteieningsproses waarvoor in die wetsontwerp voorsiening gemaak word, en wat strydig met die grondwet is.

Hier is onder meer benadruk dat die poging om die onus op die grondeienaar te plaas om die geldigheid van ‘n onteienings- en uitsettingsbevel teen te staan nadat die hele onteieningsproses afgehandel is, ook teen die grondwet indruis.

Meintjes sê TLU SA ondersteun die Instituut vir Rasseverhoudinge (IRR) se soortgelyke versoek aan die president.

 Bron – Vryburger


Enjoyed this post? Share it!