Tongaat boer oorlede na aanval

Die boer van Tongaat, Simon Shephard, is in die hoësorgeenheid van die Alberlito-hospitaal oorlede na ‘n wreedaardige aanval verlede maand met ‘n kapmes in sy plaashuis.

Shephard (80 jaar) is vroeër in ‘n geïnduseerde koma geplaas nadat hy asemhalingsprobleme ondervind het.

Die oorsaak van sy dood kan waarskynlik aan hartversaking toegewyt word.

Volgens sy dogter, Lara Bellamy, moet die oorsaak van sy oorlye nog bepaal word.

‘n Speurder van Umhlali wat die saak hanteer, het aangedui dat die aanklagte teen die twee mans, wat inhegtenis geneem is in verband met die misdaad, na moord verander kan word sodra die nadoodse-ondersoek afgehandel is.

Shephard en sy vrou Joy (78 jaar) is op Sondag 19 Junie in hulle plaashuis oorval terwyl hulle geslaap het.

Die aanvallers het aanvanklik Joy oorval, maar sy kon daarin geslaag om te ontvlug en het haar in ‘n vertrek toegesluit waarvandaan sy geskakel het om hulp te ontbied.

Haar man het hom met ‘n vuurwapen probeer verdedig. Die wapen het egter geweier toe hy dit wou afvuur. Hy is daarna wreed met ‘n kapmes aangerand en hulle het uiteindelik met sy vuurwapen ontvlug.

 Bron: Vryburger


Enjoyed this post? Share it!