Tukkies en US keer Afrikaans rug toe

 Twee voorheen ‘tradisioneel’ Afrikaanse universiteite het pas Afrikaans ‘n verdere nekslag as akademiese taal toegedien met die aanvaarding van hulle nuwe taalbeleidsrigtings.

Dit volg nadat die Universiteit van Pretoria se universiteitsraad met ‘n oorweldigende meerderheid besluit het om die knie te buig voor politieke druk deur dit ‘n suiwer Engelse instelling te maak.

Die nuwe taalbeleid is volgens ‘n verklaring deur die universiteit bedoel om “sosiale kohesie” te fasiliteer en inklusiwiteit te bevorder.

Hiermee wil dit voorkom asof Afrikaans die gestigmatiseerde politieke etiket omgehang word dat dit die teenoorgestelde sou doen as wat deur Tukkies beoog word.

Die nuwe taalbeleid wat so vroeg as volgende jaar ingestel kan word, sal beteken dat Engels die vernaamste onderrigtaal is, die enigste taal is waarin eksamens geskryf sal word, lesings gegee sal word en studiemateriaal in gepubliseer sal word.

Afrikaans is dus algeheel deur Tukkies as akademiese taal gemarginaliseer weens politieke druk deur veral die EFF.

‘n Oorweldigende meerderheid het ook by die Universiteit van Stellenbosch (US) hulle gewig ingegooi by ‘n nuwe taalbeleid wat die beskerming van Afrikaans effektief beëindig.

‘n Hele paar sogenaamde praktiese oorwegings is ingebou in die US se nuwe taalbeleid, en beteken dat Afrikaans dermate heeltemal in die praktyk op die kampus doodgewurg kan word.

Na die besluit geneem is, het een van die raadslede, Jannie van der Westhuizen, rektor van die Paul Roos Gimnasium uit die raad bedank.

Hy en vyf ander raadslede het uit die vergadering gestap.

Die Universiteit van die Vrystaat, onder leiding van sy uittredende rektor en vise-kanselier Jonathan Jansen, het die voortou geneem deur Engels as enigste akademiese taal op die kampus te aanvaar. Dit sal reeds vanaf volgende jaar by Kovsies geld.

Foto – Die #AfrikaansMustFall-beweging is hoofsaaklik deur die EFF op kampusse gedryf.

Bron: Vryburger


Enjoyed this post? Share it!