Twee verdagtes in hof oor moord op Annatjie Myburgh

‘n Tweede verdagte sal vandag in landdroshof op Witrivier verskyn in verband met die verdwyning en moord op Annatjie Myburgh (58 jaar).

Die 32-jarige man van Mosambiek is Sondagaand aangekeer en sal saam met ‘n jonger verdagte (26 jaar) verskyn wat vroeër in hegtenis geneem is.

Haar liggaam is in Sondag in die vroeë oggendure sowat 7km buite Witrivier in ‘n plantasie deur die eerste verdagte aan die polisie uitgewys.

Die oorsaak van haar dood is op hierdie stadium nog nie bekend nie. Haar voertuig, ‘n wit Pajero, is in die Kabokweni-woonbuurt buite Witrivier gekry. Die voertuig is deur die polisie vir forensiese leidrade gefynkam.

Myburgh is Woensdagoggend vermoedelik by die hek van haar en haar man, Wendell, se kleinhoewe by Curlews naby Rocky’s Drift gekaap, en met haar voertuig ontvoer.

Grootskaalse soektogte is daarna oor etlike dae na haar geloods en is gekenmerk deur ‘n gemeenskap wat saamgestaan het om na ‘n baie geliefde inwoner te help soek.

Bron – Vryburger


Enjoyed this post? Share it!