Veediewe slag 38 dragtige ooie

skape1

 

Veediewe het ‘n wreedaardige slagting op 38 dragtige ooie in die Chrissiesmeer-omgewing uitgevoer.

Benewens die 38 dragtige ooie wat moontlik deur ‘n berugte Oos-Transvaalse veediefstalsindikaat op die plaas van mnr. Johan Botha geslag is, het hulle ook nog 40 skape gesteel. 

Hy het die verlies op minstens R2 000 per skaap gestel. Die ooie sou aanstaande week begin lam het. Hulle koppe en fetusse is net so in die veld gelos waar die slagting plaasgevind het.

Boere in die oostelike deel van Oos-Transvaal se finansiële verlies weens veediefstal gedurende hierdie eerste paar maande van vanjaar beloop al R25 miljoen volgens Danie du Plessis, die TLU SA se streeksvoorsitter in die provinsie. Die deel waarna hy verwys, sluit onder meer Ermelo, Carolina, Breyten en Chrissiesmeer in.

Die diefstal is vermoedelik gepleeg deur dieselfde sindikaat want hul werkwyse is om telkens ‘n klomp skape te voet na kampe op buurplase aan te jaag, hulle net daar te slag en die karkasse op ‘n voertuig te laai wat gereed staan.

In van die voorvalle wat in die omgewing voorgekom het, is van die skaaplammers deur die veediewe doodgeslaan.

 Bron: Vryburger

Enjoyed this post? Share it!