Verlaagde standaarde in basiese onderwysstelsel ly tot leemtes en benadeelling matrikulante

Met die bekendmaking van die matriekuitslae, blyk dit dat daar ‘n slaagsyfer van slegs 75% is, terwyl leerlinge wat nie uiteindelik matriek maak nie nadat hulle met hulle skoolloopbaan begin het, toegeneem het en dus geen matriek het nie.

Suid-Afrika se basiese onderwysstelsel met sy verlaagde standaarde is bloot te gebrekkig om leerlinge na behore voor te berei vir naskoolse opleiding en dit plaas ʼn demper op die uitslae vir die 2017-matrieks wat pas aangekondig is, sê adv. Anton Alberts, VF Plus-voorsitter, en dr. Wynand Boshoff, VF Plus-leier in die Noord-Kaap.

Adv. Alberts en dr. Boshoff het die suksesvolle leerlinge nogtans namens die VF Plus gelukgewens met die uitslae en het die onsuksesvolles gevra om nie moed op te gee nie en om alles in die stryd te werp om met voortgesette pogings wel hul matriekeksamen te slaag.

Volgens adv. Alberts en dr. Boshoff is daar veral drie groot leemtes wat leerlinge van die huidige stelsel benadeel. Dit is:

* Matriek is vir die meeste leerlinge die kwalifikasie waarmee die beroepswêreld betree word, maar tog word daar nie op beroepsvaardighede gefokus nie.

* Onderwys word ook toenemend gesentraliseer om die ANC ideologies te dien. Dit marginaliseer almal wat na beter strewe.

* In die plek van die Gautengse onderwysminister se voorstel van groter sentralisering in die aanbieding van matriekeksamens, stel die VF Plus groter keusevryheid voor. Skole moet daarvolgens ‘n geldelike bewilliging van die staat ontvang, wat gebruik kan word om óf by die departement van basiese onderwys, óf by een van die onafhanklike eksamenrade (IEB of SACAI) in te skryf.

Afrikaanssprekende matrikulante, veral in provinsies soos die Noord- en Wes-Kaap, word ook toenemend deur die hoër-onderwysbedeling in die steek gelaat. In stede daarvan dat hoër onderwys na ander inheemse tale uitgebrei word, word ‘n misplaaste weergawe van regstelling gedoen deur Afrikaans op daardie vlak met Engels te vervang.


Enjoyed this post? Share it!