Verligting by petrolpomp dalk op pad

Johannesburg. – Motoriste kan dalk in Augustus welkome verligting by die petrolpompe kry.

Die sterker rand en lae olieprys in die nadraai van Brittanje se besluit om die Europese Unie (EU) te verlaat, kan goeie nuus bring, sê die Automobiel Assosiasie (AA).

“Nadat die rand aanvanklik verswak het ná die Britse referendum se uitslag laat Junie, het die rand sedertdien versterk,” sê die AA.

“Terselfdertyd het internasionale petroleumpryse gedaal weens ekonomiese onsekerheid ná die referendum. Die gevolg is dat brandstofpryse gunstige tekens toon.”

Volgens die jongste data van die Sentrale Energiefonds kan petrol se prys met sowat 83c per liter daal, terwyl diesel s’n met 45c per liter kan val.

Die AA sê ten spyte van hierdie positiewe prentjie is dit moeilik om te sê wat in die res van die maand kan gebeur. “Die onderliggende tendens oor die laaste paar maande was vir hoër brandstofpryse soos wat die rand verswak het en internasionale oliepryse geklim het.

“Dit is nog nie duidelik wat die uitwerking van onlangse gebeure op hierdie tendens sal wees nie, en dit sal voortydig wees om te aanvaar dat dit omgekeer sal word.”

Die AA raai motoriste aan om “konserwatief” te bly en nie bykomende uitgawes aan te gaan met die verwagting van volhoubare dalings in brandstofpryse nie.

Bron: Netwerk24


 

Enjoyed this post? Share it!