Vermeende plaasaanvallers ontsnap Uit Sannieshof polisieselle – slagoffer leef nou in vrees

Drie vermeende plaasaanvallers wat glo betrokke was by die moord op B.C. Greyling en die verkragting van Blackie van den Berg, het Dinsdagoggend uit die polisieselle in Sannieshof ontsnap.

Hulle het na wat betroubaar verneem word ’n saag gebruik om tralies in die tronksel oop te kry toe hulle net ná 06:00 ontsnap het.
Van den Berg se beste vriendin en aangetroude niggie, Coreen van den Berg, sê Blackie leef nou in vrees, maar is glad nie meer op die plaas naby Sannieshof waar sy op 2 Junie aangeval en verkrag is nie.

“Sy gaan nou elders tuis en vriende en familie is pal by haar.”

Van den Berg se aanvallers het tydens die aanval gedreig hulle gaan terugkom en haar vermoor indien die boere of polisie opdaag. Hulle het gevlug toe Van den Berg se buurman op die plaas aangekom het, nadat sy hom gebel en om hulp gevra het. Die twee is later dieselfde dag vasgetrek.

Een van Van den Berg se vermeende aanvallers is Maandag in die landdroshof in Delareyville borgtog toegestaan maar die ander een nie. Dis nie seker of die verdagte wat borgtog gekry het, reeds sy borggeld betaal het en of hy nog in aanhouding was nie. Die verdagtes in Van den Berg se saak se name kan nie bekend gemaak word nie omdat hulle van ’n seksuele misdryf aangekla word en nog nie gepleit het nie.

Die polisie kon nie dadelik die name verskaf van presies watter verdagtes in onderskeidelik die aanval op Van den Berg en B.C. Greyling, ontsnap het nie.

Greyling, sy ma, Magdaleen, en vrou, Marlette, is op 16 Mei op hul plaas naby Sannieshof oorval terwyl hulle aandete geëet het. Greyling is doodgeskiet en Marlette gewond. Magdaleen (81) het onder ’n tafel elders in die huis weggekruip en is nie beseer nie.

Die ses verdagtes in die B.C. Greyling-moord is: France Kubone (26), Tebogo Mogolotsane (28), Small Mokgele (29), Zacharia Nyalimathe (33), Musona Nyathi (35) en Joseph Zakenya (32). Een van hulle wat glo net gehelp het met vervoer, is op borgtog vrygelaat. Die res was egter nog in aanhouding.

Ná die ontsnapping Dinsdagoggend is boodskappe op onder meer AfriForum se veiligheidsgroep in Noordwes gestuur, waarin beskryf is een van die ontsnaptes dra ’n grys sweetpak, die tweede een het ’n rooi hemp en swart leerbaadjie aan en die derde verdagte dra ’n rooi baadjie.

Boere en die polisie het Dinsdagoggend saam na die drie mans gesoek.


Enjoyed this post? Share it!

 
  • Jo Pearce

    Waar kry hul die saag? Iets is groot fout!!!!