Vermiste plaasvrou van Noordwes Provinsie gevind – naak en vermoor!

Naakte lyk van bejaarde plaasvrou in Noordwes gevind na uitgebreide soektog die naweek.

Elsa Erasmus, die vrou van die Schweizer-Reneke-distrik in Noordwes wat sedert Saterdag vermis was, se liggaam is gevind.

Sers. Kelebogile Moleko, woordvoerder van die polisie, het bevestig Erasmus se liggaam is naby haar plaas tussen Amalia en Vryburg gevind. Sy het gesê Erasmus se bakkie is ook gevind ʼn paar kilometer van waar haar liggaam aangetref is.

Volgens Moleko sal die oorsaak van Erasmus se dood deur ʼn nadoodse ondersoek bepaal word.
Daar was die naweek berig dat ʼn grootskaalse soektog is na Erasmus van stapel gestuur nadat sy Saterdag uit haar huis verdwyn het.

Hannes de Jager, eienaar van ʼn spoorsnymaatskappy van Hertzogville wat by die soektog betrokke was, het aan die media gesê Erasmus se familie het bekommerd geraak nadat hulle Saterdag omstreeks 17:30 haar nie telefonies in die hande kon kry nie.

Iemand is na die plaas, waar Erasmus alleen gewoon het, om ondersoek in te stel en het gesien dat die inhoud van die huis omgekeer is asof daar ʼn inbraak was. Erasmus se Toyota Hilux-bakkie was ook vermis.

Volgens inligting op sosiale media was Erasmus 74 jaar oud. Die polisie ondersoek ʼn saak van moord en huisbraak.

Intussen het nuwe informasie vorendag gekom:

Dit het gelyk asof ’n “tornado” deur die plaashuis is. Haar beursie met geld in en haar bankkaarte was daar, maar van Elsa Erasmus (74) was daar geen teken nie.

Erasmus se naakte lyk is Sondag omstreeks 12:30, sowat 18 uur nadat mense by die huis begin opdaag het, elders op haar beesplaas, Newcastle, naby Amalia in Noordwes gevind.

Haar hande was agter haar rug vasgebind. Haar dogter Nada Nel vermoed die moordenaars het serpe of een van haar oorlede pa se dasse daarvoor gebruik.
“My pa se dasse, wat nog in sy kas gehang het, lê hier in die huis op die grond rond,” sê Nel.

Nel sê familielede het Erasmus Saterdag omstreeks 17:30 probeer kontak. Die eerste besorgdes het omstreeks 18:00 op die plaas opgedaag.

Die huis se krag was af. ’n Onbekende getal aanvallers het Saterdag vermoedelik tussen 12:00 en 16:00 ingebreek.

Volgens Nel het hulle die diefwering voor die sitkamervenster met ’n stuk yster oopgebreek.

Nel sê dit is onduidelik of hulle ingebreek het toe haar ma die middag geslaap het en of hulle haar ingewag het toe sy van die beeste af teruggekom het.

Die huis is omgekeer.

Erasmus se beursie met geld in en haar bankkaarte was nog in die slaapkamer.
Die kluis is oopgemaak en Erasmus se rewolwer en .22-geweer is gesteel.

Marius Müller, AfriForum se na­sionale veiligheids­koördineerder, sê dit lyk asof ’n tornado deur die huis is.

Die aanvallers is in Erasmus se silwerkleurige Toyota-dubbelkajuitbakkie daar weg.

Die soektog is Sondagoggend teen 02:00 gestaak en 06:00 met sonsopkoms hervat
.
Omstreeks 09:30 is Erasmus se bakkie uit die private en polisiehelikopters wat aan die soektog deelgeneem het, opgemerk. Dit het sowat 2 km van die plaashuis gestaan.

Volgens ’n ingeligte het die aanvallers vermoedelik in die bakkie geslaap, want die enjin en die komberse in die bakkie was nog warm.

Nel sê hulle vermoed die aanvallers het verdwaal tussen die kampe, wat elektriese heinings het. “Hulle kon nie ’n pad kry om weg te kom nie.”
Erasmus was skriba van die NG gemeente Amalia.

Nel sê haar ma sou nie ’n vlieg skade aangedoen het nie.
“Dit is sleg. Dit is al wat ek kan sê.”

Erasmus woon sedert haar troue in 1968 by Amalia. Sedert haar man, Hendrik, drie jaar gelede dood is, het sy alleen op die plaas gewoon.

Erasmus se niggie, Esther Fourie, sê sy was ’n hardwerkende vrou wat baie vir die gemeenskap omgegee het.

“Pragtig. Omgee. Noem dit.”

Nel het twee susters, Elma Potgieter en Ciska Muth.

Niemand is teen Sondagaand nog in hegtenis geneem nie. Die polisie was laatmiddag nog op die toneel. Sers. Kelebogile Moleko, polisiewoordvoerder, sê die polisie probeer nog vasstel hoe sy vermoor is.


Enjoyed this post? Share it!