Vertragings sal nog maande lank voorkom, sê Metrorail

Metro trainVertragings sal nog maande lank voorkom, sê Metrorail

Volgens Riana Scott, Metrorail-woordvoerder, sal Metrorail-treindienste onbepaald en “vir so lank as wat dit nodig is om die skade te herstel” vertraag bly.

“Hoewel al ons hulpbronne ingespan word om dit te herstel, is die verwagte omkeertyd tussen ses maande en ’n jaar. Vertragings al egter korter wees,” het sy gister gesê.

Etlike voorvalle van vandalisme en brandstigting die afgelope paar maande waarin treinwaens uitgebrand en peronne beskadig is, het tot daaglikse vertragings en die kansellasie van treine gelei.

Scott het ook gesê die tekort aan treine kan tot oorvol waens lei en het ’n beroep op pendelaars gedoen om versigtig te wees wanneer hulle op- en afklim.

Herstelwerk aan skade aan die lyne tussen Philippi en
Nyanga, en Esplanade en Wood­stock, asook skade aan perronne 11 en 12 by die Kaapstad-stasie is reeds aan die gang.

Volgens Metrorail is die die grootste oorsake van vertragings:

Vandalisme: Kabeldiefstal by Mandalay en tussen Kaapstad en Esplanade het gelei tot ernstige ontwrigting dwarsoor die spoornetwerk. Tot dié kommunikasiekabels herstel is, wat tussen vier en ses weke kan duur, sal treine met die hand gemagtig word, wat ’n stadiger proses is. Sommige treine is gekanselleer om te verhoed dat treine weens die stadiger proses ophoop.

Brandstigting: Metrorail het vanjaar reeds 17 passasierswaens ter waarde van R70 miljoen verloor weens brandstigting. Die Wes-Kaap het 89 treinstelle nodig om die rooster vol te maak, maar weens die verliese is daar minder treine, en gevolglik moes van die dienste gekanselleer word.

Verouderde infrastruktuur: Die spoorinfrastruktuur het aan die einde van sy lewensduur gekom en weens ’n toename in tegniese foute is meer instandhoudingswerk nodig. Herstelwerk aan foutiewe stroombane op die lyne tussen Bonteheuwel en Netreg en tussen Mandalay en Stockroad duur voort.

Sand op spoorlyne: Die suidoostewind waai sand oor die treinspore en dit ontwrig treindienste. Tans is die diens tussen Vishoek en Simonstad weens sand op die spoor gekanselleer. – Netwerk24

Enjoyed this post? Share it!