Vrou wat bejaardes besteel kry 5 jaar tronkstraf

Terwyl die bejaardes van ’n aftreeoord in Bloemfontein hul sente moes omdraai het ’n administratiewe assistent van dié oord in ’n casino gesit en van die geld waaruit sy hulle bedrieg het, weggedobbel.

Angela Theron (65), van Theunissensingel in Fichardtpark is Dinsdag deur streeklanddros Dawn Soomaroo vir vyf jaar effektief tronk toe gestuur. Sy het ’n sesde jaar voorwaardelik opgeskort.

Theron het altesaam R691 137, wat sy te veel van die inwoners van die Rosenheim-oord vir water en krag van 2013 tot 2015 ingevorder het, in haar eie bankrekening inbetaal.

Soomaroo sê Theron was daar in die aftreeoord en het gesien wat die invloed van haar dade op haar slagoffers was. Sy het gesien hoe swaar hulle kry en tog het sy nog van hul geld gaan wegdobbel. “Sy het hulle nie regtig jammer gekry nie. Haar gewete het haar nie gepla nie. Sy het nie werklik berou nie. As sy nie uitgevang is nie, sou sy nie opgehou het nie.”

Dié bejaardes, van wie sowat die helfte van ’n pensioen afhanklik is, het nooit hul rekeninge vir krag en water bevraagteken nie. Hulle het haar vertrou.

Theron het glo ook geldelike probleme gehad nadat sy en haar man, Thomas, die Francisco-koffiewinkel in die Loch Logan-waterfrontsentrum verloor het. Al hul spaargeld was in dié winkel belê.

Hulle was oorspronklik van Ladybrand.

Haar familie het soveel druk vir geld op haar geplaas dat sy twee keer probeer het om haar eie lewe te neem. Hulle het te min vir haar omgegee om haar finansiële las te verlig, sê Soomaroo.

Annelie van Wyk van die spesiale handelsmisdaadeenheid het aangekla.

Bastiaan Theunissen het vir Theron opgetree. Kapt. Ansie Oelofse was die ondersoekbeampte.

Bron: Netwerk24


 

Enjoyed this post? Share it!