Vuwani-winkels (vir nou) weer oop ná geweld

Vuwani-winkels (vir nou) weer oop ná geweld
  foto News 24

‘n Skool wat Donderdag in die Mashau-nedersetting in Vuwani afgebrand is. Foto: Joshua Sebola

Die geweldgeteisterde gebied waar 23 skole sedert Sondag afgebrand is, is Vrydag stil met polisielede wat padblokkades beman en voertuie deursoek.

Winkels het ook 12:00 vir die eerste keer in dae oopgemaak. Taxi’s en voertuie ry ook weer in die strate waar gebreekte glas en swart gebrande roet, van die betogings, steeds te sien is.

Mense drentel in die stofstrate na die winkels en kinders wat nie skool kan gaan nie, speel in groepe tussen rondloperhonde.

Inwoners van Vuwani is ontsteld omdat die hooggeregshof in Polokwane ’n week gelede beslis het hulle het nie grondige redes om die munisipale afbakening teen te gaan nie. Die uitgestrekte beboste gebied, sowat 150 km noordoos van Polokwane, gaan ná die munisipale verkiesing saam met Malamulele in ’n nuwe munisipaliteit ingelyf word.

Vuwani is tans deel van die Makhado-munisipaliteit in Louis Trichardt.

Kenny Mathiva, woordvoerder van Stan Mathabatha, Limpopo-premier, het gesê vergaderings word tussen belangegroepe gehou om uit te vind wat al die redes is waarom geweld uitgebreek het. Van die Venda-inwoners sê hulle wil nie ’n munisipaliteit met Tsongas in Malamulele deel nie. Die beweerde onmin tussen stamme word ondersoek.

David Tshitonga, ’n bejaarde inwoner van Vuwani, het Vrydagmiddag in ’n lang ry gestaan om by die plaaslike Spar kos te koop.

“Ons het baie honger geword, want die winkels was alles gesluit. Ons hoor die koning (Toni Mphephu Ramabulana) praat met mense so ons hoop die probleme hou nou op.”

L.J Coetzee, ’n bestuurder by Spar, se hulle het derduisende rande se skade gely omdat hulle van hope bederfbare kos ontslae moes raak.

Hy sê van die gemeenskapslede het gesê hulle kan vandag 12:00 oopmaak en Saterdag sake doen, maar Sondagmiddag begin die protesaksie weer.

“Dit is verskriklik dat daar nou kinders is wat nie kan skool bywoon nie, want daar is nie skole nie. Hulle gaan ongeletterd bly en daar is geen werk vir ongeletterdes nie.”

Angie Motshekga, minister van basiese onderwys, David Mohlobo, minister van staatsveiligheid, Des van Rooyen, minister van samewerkende regering, tradisionele sake en menslike nedersettings, vergader steeds met Ramabulana by sy paleis naby Nzhelele, sowat 50 km vanaf Vuwani.

Regeringswoordvoerders het gesê die ministers sal vandag Vuwani besoek maar ná 13:00 was daar geen duidelikheid of die besoek sou voortgaan of nie.

Lt.kol. Malesela Ledwaba, polisiewoordvoerder in Limpopo, sê die 15 mense wat weens brandstigting in hegtenis geneem is, sal Maandag in die landdroshof in Vuwani verskyn – News 24

Enjoyed this post? Share it!