Wapens moet betyds hernu word

Die Polisie het wapeneienaars daaraan herinner dat wapenlisensies 90 dae vóór die vervaldatum hernu moet word.
Gewoonlik is ‘n laat hernuwing oor die hoof gesien, maar die vergunning is pas deur die Polisie se hoofkantoor ingekort en daar gaan streng opgetree word teen diegene wat nie betyds hulle lisensies hernu het nie.
Die Polisie het ’n dringende skrywe aan alle stasiekommissarisse gerig waarin dit uitgespel word, dat indien die bepaling nie nagekom word nie, kan die vuurwapenlisensie gekanselleer word.
Wat dit in effek beteken is dat laatslapers mag hulle wapens verloor deurdat dit verkoop of vernietig kan word of by ’n handelaar ingehandig moet word om van nuuts af vir dieselfde wapen om ’n lisensie aansoek te doen.
‘n Kundige sê hierdie stap raak alle lisensies, permitte of sertifikate vir vuurwapens wat sedert 2004 uitgereik is. Die meeste vuurwapenlisensies is tien jaar geldig en moet nou hernu word.
Lisensies vir handwapens vir selfverdediging is vyf jaar geldig, maar die polisie het tot onlangs nog laat hernuwingsaansoeke aanvaar, maar nou gaan die wet die eerste keer streng toegepas word. – Vryburger

Enjoyed this post? Share it!