Waterbeperkings dringend nodig in Vaalrivierstelsel

Onmiddellike waterbeperkings is noodsaaklik in ‘n paar provinsies, maar die ANC-staatsbestel het alweer te laat wakker geskrik om dit tydig te implementeer omdat vooruitbeplanning nie gedoen word nie.

Dit is veral die daling van die hoeveelheid water in die Vaalrivierstelsel met sowat 23% wat dringende waterbeperkings in Sentraal-Transvaal, dele van Oos-Transvaal, die Noord-Vrystaat en dele van die Wes-Transvaal noodsaak.

Die departement van water en sanitasie se ampsdraers het vandeesweek op ’n vergadering met onder meer verteenwoordigers van die Trans-Caledon-tonnelbestuur, Eskom en nywerhede gesê “onmiddellike” waterbeperkings is noodsaaklik”.

Dit kan na raming tot soveel as 12 miljoen mense raak, en intussen stroom mense steeds in van ander Afrika-lande en vanuit die Ooste na hierdie provinsies.

Maar dit is veral boere wat swaar getref sal word te midde van die nadraai van ‘n droogte omdat hulle hul waterverbruik met 20% sal moet verminder.

Volgens die departement sal Eskom en nywerhede soos steenkoolmyne en Sasol nie geraak word nie omdat hulle “die ekonomie aan die gang moet hou”.

Boere wat kos moet produseer en voorkom dat mense van honger omkom, val blykbaar nie in die ANC-regime se kategorie van “ekonomie” en ‘n prioriteit as synde lewensnoodsaaklik nie.

Die hele proses om hierdie waterbeperkings af te kondig en te reguleer, is egter bo die departement se vuurmaakplek, en kan maande duur voordat dit deurgevoer word.

Intussen word die water net al hoe minder in die Vaalrivierstelsel.

Die Vaaldam is tans 40,9% vol (’n jaar gelede was dit 74%), die Sterkfonteindam is 89% vol (98,3% vol in 2015), die Katsedam 61% (87,6% verlede jaar) en die Bloemhofdam 22,2% (64,9% in 2015).

Op die langtermyn gaan die watertekort in die volgende paar jaar moontlik aansienlik vererger omdat fase 2 van die Lesotho-Hooglandprojek om die Polihali-dam te bou na verwagting eers in 2024 afgehandel sal wees.

Die aanvanklike datum vir die voltooiing van die betrokke dam was in 2019-’20.

 Bron – Vryburger


Enjoyed this post? Share it!