Werker inhegtenis geneem na Plaasmoord in Harties

Artikel 1

Koos Pansegrauw se gesig moes Woensdagmiddag vir die 16-jarige Daniëlle Potgieter gewys het daar is groot fout in haar ma se huis.

Hy het die kind probeer keer toe sy wou instorm, maar kon nie.

Hy was destyds in die weermag, maar hy het nog nooit so iets gesien soos toe hy Laurika Potgieter (44) se bebloede lyk in die gang kry nie, het Pansegrauw Donderdag hees erken.

“Dit was iets wat jy nie wil sien nie. Laurika se bors was vol bloed.”

Daniëlle was egter te vinnig. Haar vierjarige krulkop-sussie, Nerike, was op haar hakke.

Toe gryp Pansegrauw maar die kleintjie voordat sy ook haar ma se lyk sien.

Potgieter is verskeie kere met ’n skerp voorwerp in die bors gesteek. Sy is vermoedelik ook met ’n stomp voorwerp geslaan.

’n Pik sonder ’n steel is op die toneel by die plaashuis in Rietfontein, Hartbeespoort, gekry.

’n Rekenaar, skootrekenaar en selfoon is geroof.

Twee verdagtes is reeds aangekeer.

Potgieter se man is twee jaar gelede aan ’n hartaanval dood. Sy het haar man se padwerk-onderneming oorgeneem om haar en hul drie dogters te onderhou.

Die gemeenskap het die gesinnetjie onder hul vlerk geneem.

Die oudste dogter, Elsa (20), het later by ’n vriend ingetrek.

“Laurika het selfs fudge op die damwal verkoop om vir haar kinders kos te gee,” het Pansegrauw, ’n goeie vriend van die gesin, gesê.

Olga Henning, ’n vriendin, het Donderdag buite die huis gewag terwyl Elsa ingegaan het om van haar sussies se goed te kry.

Die twee jongstes is in die sorg van iemand na aan die gesin.

“Laurika se buurman (wat ’n ent verder op die plaas bly) het so om 13:00 gesien sy ry verby om die kleintjie by die kleuterskool te gaan haal.

“Om die een of ander rede het Laurika omgedraai en terug na haar huis gery.

“Teen 16:30 het die kleuterskool my gebel en gevra of ék vir Nerike kom haal, want haar ma het nie gekom nie,” het Henning vertel.

Sy het vir Pansegrauw gebel waar hy by ’n skool besig was met atletiekafrigting vir onder andere Daniëlle.

Intussen, het Pansegrauw gesê, het hy ’n “Please call me”-boodskap van een van Laurika se werkers gekry.

“Die werker het gesê iets is fout, want albei Laurika se voertuie staan daar, maar as hy roep, antwoord sy nie. Toe bel die kleuterskool en Olga.”

Pansegrauw het met Daniëlle in die motor vir Nerike gaan oplaai, en na die plaas gejaag.

By die inry het Daniëlle gesê iets is fout: Die huis se deure staan oop, iets wat haar ma nooit sou doen nie.

“Ek het vir die kinders gesê om in die kar te bly. Toe ek by die kombuisdeur instap, vang my oog bloed op die vloer. Toe weet ek.

“Laurika het in die gang gelê. Ek het by haar gekniel, ’n pols gesoek, maar sy was al koud.”

Pansegrauw het uitgestap. Dit was toe dat Daniëlle ingehardloop het.

“Ek kon haar nie keer nie. Sy het weer gillend uitgehardloop. Nerike wou weet wat aangaan. Ek het nie geweet wat om te sê nie. Toe gaan sit ons drie maar op die gras. Sonder woorde.”

Pansegrauw het die polisie gebel, maar dit het hulle ’n ruk gevat om die plaas te vind.

“Maar toe hulle hier aankom, toe is almal van hulle hier,” het hy gesê.

Ian Cameron, AfriForum se hoof van gemeenskapsveiligheid, het gesê die polisie was tot Donderdag ná 03:00 op die toneel. Hulle het later teruggekom.

Net ná 08:00 het hulle die eerste verdagte vasgetrek.

Potgieter se swaer, Pottie Potgieter, was dankbaar dat die kinders nie tuis was met die moord nie.

“Laurika sou terugbaklei het, ek ken haar so,” het hy gesê.

Elsa het later weer by haar ma se huis uitgekom.

Sy het op Pansegrauw afgestap, haar arms uitgestrek.

Hy het haar snikkende lyf toegevou.

Harro Rust, voorsitter van die plaaslike hoewewag, het gesê hulle het berading vir die kinders gekry.

“Hul pa se dood was reeds ’n groot trauma vir die gemeenskap. Die gesin is baie bemind,” het hy gesê.

Bron: Netwerk24

Artikel 2

Die werker wat alarm gemaak het ná die moord op Laurika Potgieter van Hartbeespoort is een van twee verdagtes wat in hegtenis geneem is.

Die ander verdagte is ’n onvergenoegde voormalige werknemer van Potgieter se padwerk-onderneming, het Beeld betroubaar verneem.

Koos Pansegrauw, ’n vriend van Potgieter (44), het gesê sy is genoop om dié werker in Februarie te laat gaan weens haar benarde finansiële situasie.

Nadat die werker laat gaan is, het Potgieter glo dreigemente ontvang.

Die twee verdagtes verskyn Maandag in die hof in Brits op aanklag van moord en diefstal, het sers. Kelebogile Moleko, polisiewoordvoerder in Noordwes, gister gesê.

Potgieter se lyk is Woensdag in haar plaashuis in Rietfontein, Hartbeespoort, gekry. Sy is verskeie kere met ’n skerp voorwerp in die bors gesteek en vermoedelik ook met ’n stomp voorwerp geslaan.

’n Rekenaar, skootrekenaar en selfone is geroof.

Volgens Moleko is die twee verdagtes ’n dag ná die moord in die Ten Rooms- informele nedersetting naby Hartbeespoort aangekeer.

“Die polisie het inligting ontvang oor iemand wat glo gesien is met twee selfone wat aan Potgieter behoort het. Die vermoorde vrou se selfone is glo daarna in sy besit gevind. Dié verdagte het in ondervraging erken hy was betrokke by die moord. ’n Tweede verdagte, wat as tuinwerker vir Potgieter gewerk het, is daarna aangekeer.”

Sy word oorleef deur drie dogters.  1/6

Bron: Netwerk24


 

Enjoyed this post? Share it!