ZUMA – ANC sal aan bewind bly tot Jesus kom

Zuma – ANC sal tot wederkoms aan bewind bly

 

Die storie van president Jacob Zuma dat die ANC sal heers tot die wederkoms is al ‘n paar keer deur hom oor die afgelope paar jaar kwytgeraak.

Die mate waartoe in Afrika aan mag geklou word, laat Zuma se woorde soos ‘n onheilspellende boodskap klink.

Hy het nou knap voor die munisipale verkiesing weer hierdie selfversekerdheid omtrent die ANC se onbetwiste diktatorskap herhaal.

Dié keer het hy dit in Hammanskraal, noord van Pretoria kwytgeraak tydens sy verkiesingsveldtog saam met die ANC se burgemeesterskandidaat, Thoko Didiza.

Volgens hom moet die mense aanvaar dat die ANC sal heers tot die wederkoms.

Hy het bygevoeg mense kla oor hierdie uitspraak, maar die ANC is geseën. Pastore het vir die party gebid, aldus Zuma.

Hammanskraal was onlangs vir etlike dae geteister deur geweldpleging omdat van die inwoners, soos in verskeie ander gebiede, teen Didiza se benoeming gekant was.

Hierdie besoek van Zuma en Didiza is bykans soos ‘n segetog vir die ANC, maar meningspeilings en politieke waarnemers wys daarop dat die party nie so seker van sy saak moet wees nie.

Voorspellings word gemaak dat die ANC se voorland die vorming van koalisies in van die groter metrogebiede en selfs gewone munisipaliteite kan wees.

Bron: Vryburger


Enjoyed this post? Share it!