Zuma -Ek was saam met wit mense in die oorlog vir vryheid en sal een van die eerstes wees om hulle te verdedig

Pres. Jacob Zuma het Donderdag gesê hy haat nie wittes nie, maar hy het gesê hy sal die waarheid praat – dat wit mense nog steeds voordeel trek uit die land se rykdom, veral wat grondeienaarskap betref.

“Mens kan nie ʼn situasie hê waar daar mense is wat grond het en hulle weet nie wat om daarmee te doen nie. Ander persone het nie ʼn enkele hektaar nie,” het Zuma gesê. “Daar is diegene wat ander beroof en hulle arm laat.”
Zuma het ontken dat die herverdeling van grond deur “Zimbabwe-agtige” grondgrype sal plaasvind, en gesê die regering sal die “ongeregtighede” van die verlede “binne die Grondwet en die wet” regstel.

Hy het egter ʼn deur oopgelos vir veranderinge in wetgewing, en gesê indien nodig sal wysigings aan die Grondwet aangebring word.

“Wat wil ek hê moet wit mense doen? Kom ons sit en kry ʼn oplossing, sodat daar geen Suid-Afrikaner kan wees wat niks het nie, terwyl ander alles het nie. Ons wil hê alle Suid-Afrikaners moet voordeel trek uit die welvaart van die land, ongeag kleur of geskiedenis.”

Pieter Groenewald, leier van die VF Plus, wat by Zuma wou weet wat hy teen wit mense het, het daarna reageer en gesê:

“Geagte president, ek aanvaar jou uitnodiging. Ons kan gesels.”

Zuma het gesê hy haat nie wit mense nie en hy dring daarop aan dat sy regering en die regerende party in nie-rassisme glo. “Ek was saam met hulle in die loopgrawe. Ek was saam met wit mense in die oorlog vir vryheid.”
Hy het bygevoeg indien enigiemand wit mense wil doodmaak, sal hy een van die eerstes wees om hulle te verdedig en vir hulle sal baklei.

Bron: Maroela Media


 

Enjoyed this post? Share it!