Zuma se hofkoste beloop R60 m. – en styg

Pres. Jacob Zuma se hofkoste kan binnekort meer as R60 miljoen beloop.

Net die “spioenbande”-hofsake het die staat al meer as R9 miljoen gekos, het die DA die afgelope week gesê.

Die kostes gaan verder die hoogte inskiet ná die nasionale vervolgingsgesag (NVG) se aankondiging voorverlede Vrydag dat hy die kwessie in die konstitusionele hof gaan beveg.

Die NVG het aangekondig hy gaan die konstitusionele hof direk nader om te appelleer teen die hooggeregshofuitspraak dat Zuma tereg moet staan op die 783 klagte van rampokkery, korrupsie en bedrog.

Zuma se aansoek om verlof tot appèl is verlede maand in die appèlhof geweier nadat die hooggeregshof in Pretoria beslis het hy moet op al die klagtes teregstaan.

Die NVG het in 2009 die korrupsieaanklagte teen die president laat vaar op grond van die sogenaamde spioenasiebande, wat kwansuis sou bewys het die sake was deel van ’n politieke sameswering teen hom. Die spioenbande is ná talle hofsake en appèlle in 2014 aan die DA oorhandig.

As al die regskostes bymekaargetel word, kan dit meer as R60 miljoen beloop, het James Selfe, voorsitter van die DA se federale uitvoerende bestuur, gister gesê.

Dit nadat Mmusi Maimane, DA-leier, vroeër vanjaar in sy repliek op die president se staatsrede gesê het al Zuma se regskostes kos die land al R49 miljoen rand.

Dit sluit in al sy regskostes in die talle hofsake waarin hy betrokke was, onder meer die sake rondom die veiligheidsopgraderings by sy Nkandla-woning en die skikking van miljoene rande wat met die voormalige nasionale direkteur van vervolging, Mxolisi Nxasana, aangegaan is.

Teen 2013 was die uitgawes R30 miljoen, luidens die antwoord op ’n parlementêre vraag.

Van die begin van die regsgeding tot September 2013 het die hofkoste in die spioenbandesake volgens ’n antwoord op ’n skriftelike parlementêre vraag van Selfe R2 337 569 beloop.

Tussen September 2013 en vanjaar was die koste volgens die DA se berekeninge nóg R7 324 000.

Die berekeninge is gedoen op grond van die feit dat Zuma dikwels van die land se duurste regslui soos adv. Kemp J Kemp SC gebruik, wat tot R60 000 per dag kos.

Die geskatte koste aan advokate sedert September 2013 het volgens die DA sowat R5,42 miljoen beloop.

Zuma moes ook kostebevele van R1,2 miljoen aan die DA betaal.

“Elke nuwe appèl jaag die koste verder op. Die aansoek vir direkte toegang tot die konstitusionele hof gaan dié bedrag waarskynlik oor R60 miljoen stoot,” het Selfe gister aan Rapport gesê.

Glynnis Breytenbach, nasionale DAwoordvoerder oor justisie, het gesê die NVG gaan voort om belastinggeld te mors. “Hulle het geen hoop op sukses nie. Hulle het die pad so ver byster geraak, ek weet nie of hulle ooit weer sal terugkom nie.”

Bron: Rapport


 

Enjoyed this post? Share it!