Die armes in SA sal na die jongste Begrotingsrede ly

Twee van die grootste skokke van die begroting deur die minister van finansies, is Motoriste in vir skok wanneer die prys van brandstof op 4 April styg met 52 sent in die vorm van bykomende heffings.

Daarvan gaan 22 sent na die algemene brandstof heffingsfonds en 30 sent na die reeds bankrot Pad Ongelukke Fonds.

Die tweede skok is dat BTW vir die eerste keer sedert 1993 verhoog word, en met een persent tot 15% verhoog word.

Hierdie verhoging was noodsaaklik na Jacob Zuma se onbesonne aankondiging van gratis tersiêre onderwys. Tesourie moet tussen R40 en R50 miljard optower om vir die gratis onderwys te betaal vir studente wat menslike uitskeiding rondgooi en geboue en koshuise beskadig en afbrand.

Belastingbetalers sal in die toekoms ook minder belastingkorting ontvang vir hul bydraes tot privaat mediese fondse.  Die geld wat so “gespaar” word sal aangewend word om die beoogde Nasionale Gesondheidsversekering van die grond te kry.

VF Plus se leier, dr. Pieter Groenewald, sê in sy reaksie op die begroting dat die minister van finansies nie die geweldige skuldlas van die regering wat deur voormalige president Jacob Zuma se administrasie veroorsaak is, daadwerklik aangespreek het nie en dat die begroting net wys hoe groot die land se finansiële probleme werklik is.

Die verwagte groeikoers van 1,5% vir 2018/19 en 2,2% in 2020 is nie genoeg om die ekonomie sodanig te laat groei dat dit ʼn wesenlike impak op werkskepping gaan hê nie, veral nie as in gedagte gehou word dat meer as ʼn miljoen mense jaarliks die arbeidsmark betree nie.

Dr. Groenewald reken dat om te sê die regering gaan oor die volgende drie jaar R85 miljard spaar, skep wel die indruk hy wil bespaar, maar net die rente op regeringskuld beloop tans R198 miljard per jaar. Die besparing is dus ʼn druppel aan die emmer.

Wat BTW aanbetref, is die VF Plus tevrede daarmee dat dit met een persent verhoog is aangesien dit belangrik is dat die land se belastingbasis verbreed word. Die VF Plus het lank reeds gevra dat BTW verhoog moet word, in stede daarvan dat persoonlike belasting buitensporig verhoog.

Op die oomblik word dit van sowat 5 miljoen belastingbetalers uit 55 miljoen landsburgers verwag om die belastingjuk alleen te dra.  Daar kan nie van ʼn sekere groep verwag word om net meer en meer belasting te betaal nie.

Wat gratis hoër onderwys aanbetref moet daar volgend VF Plus ʼn voorwaarde wees dat studente wat kwalifiseer, hul akademiese jaar moet slaag, anders sal dit ʼn blote vermorsing van belastingbetalers se geld wees.


Enjoyed this post? Share it!