Hier kom nog groot moeilikheid – Zoeloes is boos oor swart eiendom wat na staat moet gaan

Dit is nie onteiening sonder vergoeding wat die Zoeloes in KwaZulu-Natal kwaad maak nie – eerder die EFF se eis dat grond wat reeds in swart besit is aan die staat teruggegee moet word.

’n Senior IVP-leier het Donderdag ná ’n mediakonferensie van die EFF gesê Julius Malema, EFF-leier, praat “nonsens”.

“Wie is die staat? Ons het al die jare in die struggle geveg omdat grond van die mense gevat is. Dis nie van die staat geneem nie. Die grond behoort aan die mense, dit kan nie aan die staat behoort nie,” sê Albert Mncwango, IVP-adjunkvoorsitter.

Mncwango sê Zoeloes wil veg vir hul grond.

“Enigiemand wat ons grond wil vat of raak aan die Ingonyama-trust, gaan almal van ons kwaad maak.”

Malema het koning Goodwill Zwelithini getakel nadat die koning sy
onderdane opgeroep het om te veg teen die wysiging of skrapping van die­
Ingonyama-trust, soos aanbeveel deur oudpres. Kgalema Motlanthe se hoëvlakpaneel.

Alle grond – stedelik en landelik, asook dié onder beheer van Zwelithini en ander tradisionele leiers – moet volgens Malema eerder aan die staat behoort. “Ons weet nie hoekom daar op oorlogstromme gehamer word nie. Daar is geen rede tot paniek nie,” het Malema gesê.

Prins Thulani Zulu, woordvoerder van die koning, het gesê Zwelithini “is bereid om met enigiemand in gesprek te tree, ook met die EFF”.

Malema het ook die ANC in KZN daarvan beskuldig dat die provinsiale ANC-struktuur verskil van die mosie oor die onteiening van grond sonder vergoeding wat deur dié party in die parlement aanvaar is. Dié mosie is na die parlement se grondwetlike hersieningskomitee verwys.

Malema se kritiek kom nadat Sihle Zikalala, voormalige ANC-voorsitter en koördineerder van die tussentydse leierstruktuur in KZN, te kenne gegee het die ANC in KZN steun die koning.

Zikalala ontken dat hulle onteiening sonder vergoeding verwerp. Hy sê die koning is net bekommerd oor die moontlike ontbinding of wysiging aan die Ingonyama-trust.

Die verslag van die Motlanthe- paneel is ook nog nie in die parlement bespreek nie. “Daar moet eers raadpleging plaasvind.”

Zikalala sê onteiening gaan oor kommersiële grond, nie trustgrond nie.

Mncwango sê die IVP het die onteieningsmosie in die parlement gesteun sodat grond wat van swart mense weggevat is, teruggegee kan word.

“Alle ander grond in swart besit en wat reeds verdeel is, moet uitgesluit word. Die grond van die Ingonyamatrust is reeds uitgedeel onder die mense van KwaZulu-Natal, en aan die onderdane van die koning. Die regering moet eerder grond uitdeel wat in sy besit is.”

Hy vra hoe dit mense gaan help as alle grond aan die staat behoort.

“Ons het ons eie tradisionele manier om grond onder die mense uit te deel en om dit te bewerk.

“Hoekom het ons in al die oorloë geveg? Waarom was daar ’n Anglo-Boereoorlog? Ons het vir ons grond geveg. Jy kan my nie vertel die grond moet nou aan die staat teruggegee word nie.”

Deur: Netwerk 24


Enjoyed this post? Share it!