Munisipaliteit van George is ‘n “miernes van korrupsie”

Die Valke het Maandagoggend toegeslaan op die George-munisipaliteit wat deur ingeligte bronne beskryf word as ‘n “miernes van korrupsie”.

Kapt. Philani Nkwalase, woordvoerder van die Valke, het dit bevestig en sê hulle wil onder meer beslag lê op dokumente wat verband hou met die verkryging van tenders.

Anton Bredell, Wes Kaapse LUR vir plaaslike regering, het bevestig dat daar ‘n klopjag plaasvind na afloop van ‘n grootskaalse ondersoek na korrupsie en wanbestuur, wat deur sy kantoor hanteer is.

‘n Gespesialiseerde eenheid sal die ondersoek lei. Bredell sê dit vorm deel van ‘n forensiese ondersoek wat reeds ‘n geruime tyd aan die gang is.

Daar is op die skootrekenaars en hardeskywe van verskeie senior amptenare beslag gelê, en lasbriewe is uitgereik vir sekere senior politici en amptenare van die plaaslike owerheid.

George se eerste burger, Melvin Naik, en Trevor Botha, die munisipale bestuurder, is na wat verneem word onder diegene wat ondersoek word.

Volgens Nkwalase is lede van die Valke by die munisipaliteit om beslag te lê op dokumente wat verband hou met beweerde onreëlmatighede met tenderprosesse en die verkryging van tenders.

“Niemand gaan vandag in hegtenis geneem word nie en geen aanklagte is nog aanhangig gemaak nie,” sê Nkwalase.


Enjoyed this post? Share it!