#PLAASAANVAL: Paartjie ‘Hou Kop’ Tydens Plaasaanval – Boer Skiet Een Skurk In Die Gesig – Vredendal

‘n Gesin van Vredendal in die Wes-Kaap sê hulle is “dankbaar om steeds te lewe” nadat hulle Saterdag kort voor middernag die slagoffers van nog ‘n plaasaanval was.  

Nico Greeff het Sondagoggend gesê hy en sy vrou, Rene, het om 23:30 wakker geword van hulle honde wat ‘aggressief’  geblaf het.  

Greeff sê hoewel die egpaar nie dadelik onraad gemerk het nie, is hulle ‘n paar minute later wakker gemaak deur  oordonderde stamp- en rukgeluide.   

Hy sê sy vrou het aanvanklik uit die bed geklim om te sien of sy iets kon sien en sy het twee boewe buite hul huis gewaar. Die skurke was volgens hom besig om aan die veiligheidshek te trek en te kap.  

“Toe die skurk haar sien, het hy na die voordeur gehardloop. Sy het in die kamer ingestorm en gesê: “Nico, daar is mans wat probeer inbreek. Ek het dadelik opgespring en my haelgeweer gegryp – wat altyd langs my bed staan – en na die voordeur gehardloop,” het hy gesê.  

Greef sê dat die skurke teen daardie tyd reeds die sekuriteitshek oopgebreek het en in die proses was om die houtdeur ook oop te breek.   

Hy het gesê Rene het ​​teen die houtdeur gaan staan in ‘n poging om die boewe uit te hou. “Hulle het daarin geslaag om die deur oop te breek en ek het die geweer gelaai. Hulle wou probeer om die deur oop te druk en Rene het dit  toegedruk.  Hulle het dit weer probeer oopdruk  en ons het toe minstens twee boewe gesien. 

“Ons het kliphard geskree:” Ons het ‘n wapen en ons gaan skiet! “Hulle het hulle nie daaraan gesteur nie en net aangehou om die deur oop te dwing. Ek het vir Rene gesê sy moet eenkant  toe staan. Sy het eenkant toe gespring, ek het geskiet en een van die boewe in die gesig getref. Hulle het toe weggehardloop.”  

Greeff sê die beseerde skurk het ‘n bloedstreep van die voordeur tot deur die heining, en tot by die teerpad gelos. Die egpaar het eers later vasgestel dat daar eintlik vier boewe betrokke was by hierdie aanval.  

“Ons skoondogter het met hulle tweeling by ons kom slaap. Die boewe het beslis gekom om geld te kry of selfs om ons seer te maak. Ons is dankbaar dat ons nog lewe en dat ons tydens die hele voorval kon kophou, “het hy gesê.

Greef het die polisie geloof wat volgens hom baie vinnig op die toneel opgedaag en die aanval professioneel hanteer het.  

Kaptein Caren Coetzee, woordvoerder van die polisie, het bevestig dat ‘n saak van poging tot huisroof geopen is.  

Coetzee sê dat niemand nog in verband met die aanval in hegtenis geneem is nie.  

Deur: Cyril Blackburn / Maroela

Enjoyed this post? Share it!