Premier van Noordwes het uiteindelik besluit om sy goedjies te vat en te loop

In sy laaste begrotingstoespraak het Supra Mahumapelo vertel hoe sy kantoor ondersoek ingestel het na onreëlmatige uitgawes en die instelling van maatreëls om herhaling van sulke optrede te voorkom.

Hy het hom verbind tot hoë vlakke van etiese gedrag en doeltreffende bestuur. Alle uitstaande dissiplinêre sake moet teen die einde van 2018 voltooi wees.

Hy het sy stryd teen apartheid weer opgehaal asof dit sy eie dade regverdig.

Politieke waarnemers glo dat hy teen daardie tyd seker sy goue handdruk ontvang het en die sake begrawe wees.

Intussen het hy in ‘n onderhoud aangekondig dat hy vandag, Woensdag 9 Mei 2018, tuis sal wees nadat hy sy tasse gepak het en sy kantoor ontruim het.

Op SABC het hy gesê dat Supra Obakeng Mahumapelo teen Woensdag die gewese premier van Noordwes sal wees.

Volgelinge sal aandring dat hy sy pos as ANC voorsitter van die provinsie ook moet prysgee, maar ontleders voorspel dat hy daaraan sal klou solank hy kan.

Hy sal dalk daarvan kan afsien as hy na ‘n goedbetaalde pos “herontplooi” word, en daar word bespiegel dat hy ‘n pos in die ANC se hoofkwartier aangebied kan word.

Deur: Die Vryburger


Enjoyed this post? Share it!