Skokkende Statistieke -Altesaam 43 Plaasaanvalle In 36 Dae

 

Die organisasie het in Januarie ‘n neiging opgemerk dat agt of meer aanvalle per week plaasvind.  Generaal-Majoor Chris van Zyl, Assistent-hoofbestuurder van die TLU SA, se dit is verontrustend dat die neiging skynbaar voortduur.  “Ewe verontrustend is die voorkoms van aanvalle in Provinsies wat voorheen in ‘n mindere mate geteister is”.

Die meeste plaasaanvalle en -moorde is in 2016 en verlede jaar in Gauteng aangeteken.  Die TLU SA het in 2016 altesaam 22 moorde en 82 aanvalle in die provinsie aangeteken.  Verlede jaar is 16 moorde en 94 aanvalle daar aangeteken.  In die Wes-Kaap het vier moorde en 17 aanvalle in 2016 plaasgevind en ses moorde en 24 aanvalle verlede jaar.

Skerp Styging In Vrystaat

Vrystaat Landbou se statistiek toon ‘n styging van 22% in die aantal plaasaanvalle in die Vrystaat van 2016 tot verlede jaar.  Die aantal aanvalle in die Provinsie het van 59 tot 72 verlede jaar toegeneem, met sewe moorde wat in albei jare aangeteken is.

In albei jare is twee boere en vyf werkers en/of plaasbewoners vermoor, se Dr. Jane Buys, Veiligheidsrisiko-Analis van Vrystaat Landbou.

Die meeste van die voorvalle het in die Noord-Vrystaat plaasgevind, waar 28 aanvalle voorgekom het.  In die Oos-Vrystaat is 27 voorvalle aangemeld, terwyl 17 aanvalle in die Suid-Vrystaat plaasgevind het.

Die meeste aanvalle per dorp of stad het by Clocolan en Bloemfontein voorgekom (ses voorvalle elk).  Dit word gevolg deur Bothaville en Theunissen waar die gemeenskappe deur vier voorvalle het elk geraak is.  Vyf distrikte het drie aanvalle elk gehad, naamlik Ficksburg, Harrismith, Hoopstad , Kroonstad en Ladybrand.

Vrystaat Landbou se syfers verskil egter van die TLU SA.  Volgens die TLU SA se syfers was daar verlede jaar minder plaasaanvalle en -moorde in die Vrystaat as in 2016, naamlik 63 aanvalle en nege moorde in 2016 en 45 aanvalle en vyf moorde verlede jaar.

Waar Le Die Verskil?

Volgens Van Zyl is die verskil in die statistiek waarskynlik die gevolg van die feit dat Vrystaat Landbou ‘n verteenwoordigende boerevereniging in elke distrik van die provinsie het en gevolglik wyer dekking van die hele provinsie het.  Die TLU is afhanklik van verslae vanaf verskeie bronne, soos oorgrens-Whatsapp-groepe, sosiale media en die hoofstroommedia, se hy.

Die TLU SA teken slegs gevalle aan wat voldoen aan die definisie van ‘n plaasaanval, naamlik dat geweldmisdaad betrokke is, se Van Zy.

Buys se Vrystaat Landbou teken plaasaanvalle ook volgens die definisie van ernstige geweldsmisdaad teen mense op landbougrond aan.  “Ons teken alle voorvalle van geweld teen mense aan, ongeag of die aanval op  ‘n boer, ‘n werker, ‘n plaasbewoner of ‘n gas op landbougrond was,”

Die organisasie se statistiek word saamgestel uit inligting wat hy van sy onderskeie strukture op grondvlak ontvang.  “Die voorvalle word ook met die Poisie se statistiek vergelyk.  Dit is vir ons belangrik om alle voorvalle van ernstige geweldsmisdaad teen mense op landbougrond aan te teken,” se sy.

Landbou Weekblad

Enjoyed this post? Share it!