Vrou in Limpopo skiet aanvaller op plaas dood

’n Vrou van Groblersdal in Limpopo wat vier jaar gelede ’n plaasaanval oorleef het, het Dinsdagaand ’n plaasaanvaller doodgeskiet.

Ian Cameron, Afriforum se nasionale veiligheidshoof, sê Wilma Liebenberg was alleen tuis op die plaas, sowat 15 km buite Groblersdal op die Loskopdampad.

Vier aanvallers het probeer om die agterdeur oop te breek, waarop Liebenberg glo een deur die agterdeur met ’n .38 rewolwer geskiet het.

Sy het die man in die skouer gewond en die res van die aanvallers het op vlug geslaan. Die gewonde aanvaller is Woensdagmiddag dood.

Volgens Cameron is Liebenberg vier jaar gelede ook aangeval. Hy sê die aanvaller het voor sy dood gesê hulle het al hul inligting oor Liebenberg en haar man by die vorige aanvallers gekry.

Kobus Hildebrand, ondervoorsitter van Groblersdal Landelike Beveiliging, het bevestig dat Liebenberg die man geskiet het, maar sê hy kan nie bevestig of sy wel alleen op die plaas was en of sy wel die man deur die agterdeur geskiet het nie.

“Die polisie het Woensdag gebel en gevra of ons van ’n plaasaanval bewus is en ons het rondgespring om te probeer vasstel of dit wel die geval is en waar die aanval was,” sê Hildebrand.

“Ons het verskeie boere en groepe gekontak, maar die vrou se bure was nie eens bewus van die voorval nie en die verkeerde adres is aan ons verskaf.

“Ek het begin wonder of dit ’n wolhaarstorie kan wees, maar toe vind ons wel met ’n draai die toneel. Ons het toe besef die voorval het eintlik reeds die vorige aand plaasgevind.”

Hildebrand sê die polisie was eers ongeveer 13:00 op die toneel. Hy weet egter nie wanneer hulle ontbied is of waarom hulle so lank geneem het om te reageer nie.


Enjoyed this post? Share it!